'Bila endamên koma aştiyê bên berdan'

Wekîlê Serokê Koma BDP'ê Bengî Yildiz, diyar kir ku 'Hewldana kurdan' a Hikûmeta AKP'ê, dika şahoyê ye û wiha got: "Perdeya dawî ya dikê bi girtina endamên Koma Aştiyê re hate girtin." Li Stenbolê jî, polîsan bûyera li Colemêrgê wekî hincet nîşan dan û ji bo çalakî tenê destûra 5 daqîqeyan dan.

ÊLIH

Rêxistina BDP'ê ya Êlihê, der barê girtina 10 endamên Koma Aştî û Çareseriya Demokratîk de li avahiya bajar civîna çapameniyê pêk anî. Cîgirê Serokê Koma BDP'ê Bengî Yildiz, Seroka Rêxistina BDP'ê ya Êlihê Saadet Becerîklî û nûnerên saziyên sivîl jî beşdar bûn. Becerîklî, diyar kir ku ew dê ji bo avakirina aşityê û ji bo têkoşîna wê bihêztir bimeşîn û wiha got: "Em dê çalakiyên şermezarkirina van girtinan li darxin. Em dê sibê ji ber avahiya Rêxistina BDP'ê ya Êlihê saet di 07:00'an de heta Kolana Gulîstanê meşekê li dar bixin û daxuyaniyekê bidin çapameniyê. Em banga beşdariyê li hemû alîgirên aştî û demokrasiyêde dikin."

'Serokwezîr di warê çareserkirina pirsgirêkê de ne samîmiye'

Cîgirê Serokê Koma BDP'ê Bengî Yildiz, destnîşan kir ku her tim Rêberê PKK'ê Abdullah Ocalan riya çareseriyê li pêşiya pirsgirêkên Tirkiyê vekiriye û wiha axivî: "Birêz Ocalan înîsiyatîfa xwe bi kar anî û banga hatina koman a ji Qeldîl û Mexmûrê kir. Lê hatina koman nehate hezimkirin." Yildiz, da zanîn ku hikûmet û dewletê xwe li coşa kurdan negirt û wekî "Serkeftina dijminan" nirxandin û wiha dom kir: "Piştî vê pêşwazîkirinê Serokwezîr got ku 'Ger pêwîst be em dê pêvajoyê biqedînin. Bi vê daxuyaniyê jî raxist ber çavan ku dê pirsgiraka kurd çareser neke û ji bo çareseriyê dê nekeve nava tu hewldanan. Ya rast zarok û siyasetmedarên kurdan herî zêde di dema Hikûmeta AKP'ê de hatine girtin û binçavkirin. Hikîmet û Serokwezîr ji bo çareserkirina pirsgieraka kurd samîmî nêzîk nebûn. Hewldana weke dika şanoyê bû. Perdeya vê dikê jî bi girtina koman ve hate girtin. Kurdan ji ber dawiya dikên bi vî şeklî dîtibûn êdî naxwazin temaşe bikin."

SÊRT

Rêxistina BDP'ê ya Misircê jî girtina endamên koma aştiyê şermezar kir. Koma li Kuçeya Hunerê hatin cem hev û Serokê Rêxistina BDP'ê ya Misircê Abdulgafur Kubîlay, Cîgirê Şaredarê Misircê Çaçan Yorulmaz jî dinav debûn dowîzên, "Destên dirêjî vîna me dibin, bila bişkên", "Ji tecawîza siyasî û fîzîkî re bes e" û "Li vî welatî aştî kelepçekiriye" hilgirtin. Serokê Rêxistina BDP'ê ya Misircê Abdulgafur Kubîlay daxuyanî xwend. Kubîlay wiha got: "Bi 10 hezaran mirov mirin, bêdelên mezin hatin dayîn. Bi hezaran gund hatin hilweşandin û şewitandin. Dayikan rondin barandin." Kubîlay, anî ziman ku di 19 cotmeha 2009'an de ji bo pêşiya pêvajoya hatiye xitimîn bê vekirin li ser banga Rêberê PKK'ê Abdullah Ocalan 34 endamên Koma Aştî û Çareseriya Demokratîk hatin û wiha axivî: "Beriya niha çi hatibû serê komên aştiyê hate serê Koma Aştî û Çareseriya Demokratîk jî û 10 kes hatin girtin."

Kubîlay, da zanîn ku pirsgirêk bi girtina çareser nabe û xwest endamên koma aştiyê bên berdan. Komê piştî re jî çalakiya rûniştinê ya 5 deqîqeyan li dar xist.

ÎZMÎR

Endam û rêveberên BDP'ê yên Îzmirê jî bi heman armancê li ber Sumerbankê li hev kom bûn û bi daxuyaniyekê girtina Endamên Koma Aştî û Çareseriya Demokratîk şermezar kir. Komê pankarta "Ji aştiyê re girtin, ji Ergenekonê re tahliye" vekir û dirûşmeyên "Êrîş me bêzar nakin", "Destên dirêjî aştiyê dibin bila bişkên" berz kirin. Kom, ji Bankê heta Rêxistina AKP'ê ya Bajar meşiyan û li wir daxuyanî dan çapemeniyê. Di çalakiyê de endam û rêveberên BDP, SDP û Înîsiyatifa Dayikên Aştiyê amade bûn. Serokê Rêxistina BDP'ê ya Îzmirê Yusuf Kaya, daxuyanî xwend û girtina endamên Koma Aştiyê şermezar kir.

Komê piştî daxuyaniyê çelenga reş a "Ji aştiyê re girtin, ji Ergenokê re taliye" danîn ber deriyê AKP'ê.

WAN

Li Wanê jî girtina 10 endamên Koma Aştiyê bi meşekê hate şermezarkirin. Girseya Parlementerên BDP'ê Ozdal Uçer, endam û rêveberên BDP'ê jî di navde li ber avahiya BDP'ê ya Wanê civîyan û heta Kolana Hunerê meşiyan. Komê di meşê de pankarta "Me got aştî û qasid şandin. Lê wan got şer û girtin" vekir û dowizên "Me ji bo aştiyê muxabat şandin", "Aştî nayê kelepçekirin", "Em ne operasyonan aştiyê dixwazin" û "Qaside aşitîyê rûmeta me ne" bilind kirin. Komê bê navber dirûşmeyên "Bijî serok Apo ", "AKP şaş nebe berz kir. Li vir rêveberê BDP'ê yê Wanê daxuyanî xwen û helwesta Hikûmeta AKP'ê şermezar kir.

Parlementerê BDP'ê yê Wanê Ozdal Uçer jî dest nîşan kir ku ji ber hikûmetê li banga wan guhdar nekiriye her roj xwîn dirje û pevçûn zêde dibe. Uçer, anî ziman ku ligel rijandina xwînê û kuştinê parlementerên AKP'ê di pêşiya îhale û berjewediyên xwe dene. Uçer, anî ziman ku endamên Koma Aştiyê bi talîmata Erdogan hatine girtin û girtin şermezar kir.

STENBOL

Li Stenbolê jî Şaxa ÎHD'ê ya Stenbolê girtina 10 endamên Koma Aştî û Çareseriya Demokratîk şermezar kir. Komeleyê li avahiya xwe daxuyanî da çapemeniyê û fikarên xwe yên piştî girtina 10 endamên Koma Aştiyê anîn ziman.

AMED

DîYAR TUHAD-DER'ê jî bi heman armancê li avahiya komeleyê daxuyanî da û girtina 10 endamên Koma Aştî û Çareseriya Demokratîk şermezar kir. Di civînê de Serokê DÎYAR TUHAD-DER'ê Nîmetullah Yurek, diyar kir ku hikûmeta AKP'ê ne alîgirê aştiyê ye û wiha got: "Ger ku AKP alîgirê aştiyê ba dê operasyon zêde nebûna. Dê komê aştiyê nehatina girtin.

E-MAIL THIS

PRINT THIS